راجستھان میں بارش کا قہر، 24 گھنٹوں میں تقریبا 12 افراد کی موت، ہر طرف افراتفری

راجستھان میں بارش کا قہر، 24 گھنٹوں میں تقریبا 12 افراد کی موت، ہر طرف افراتفری

راجستھان میں جاری موسلادھار بارش نے کہرام مچا دیا ہے۔ موسلادھار بارش کے باعث لوگ ندی نالوں میں بہہ رہے ہیں، جس کی وجہ سے اموات کی تعداد میں مسلسل اضافہ ہو رہا ہے۔ گزشتہ 24 گھنٹوں کے دوران ایک درجن کے قریب افراد کی ندی نالوں میں ڈوب کر موت ہوگئی ہے۔

ے پور : راجستھان میں جاری موسلادھار بارش نے کہرام مچا دیا ہے۔ ریگستانی علاقے میں بہنے والی لونی ندی میں بہہ جانے سے تین دوستوں کی موت ہوگئی ۔ بھرت پور میں شدید بارش کی وجہ سے ایک مکان گر گیا، جس کے باعث ملبے تلے دب کر ماں بیٹی کی المناک موت ہو گئی۔ وہیں الور اور بیور کے اینی کٹ میں تالاب میں ڈوبنے سے دو بچوں کی موت ہو گئی۔ موسلادھار بارش کے باعث لوگ ندی نالوں میں بہہ رہے ہیں، جس کی وجہ سے اموات کی تعداد میں مسلسل اضافہ ہو رہا ہے۔ گزشتہ 24 گھنٹوں کے دوران ایک درجن کے قریب افراد کی ندی نالوں میں ڈوب کر موت ہوگئی ہے۔

معلومات کے مطابق مغربی راجستھان کے جودھ پور، باڑمیر اور بالوترا علاقوں میں لونی ندی میں آئے بہت زیادہ پانی میں جمعہ کو تین نوجوان بہہ گئے، جس کی وجہ سے تینوں کی موت ہو گئی۔ تینوں دوست جمعہ کو ندی میں نہانے آئے تھے۔ لیکن وہ پانی کے بہاؤ میں بہہ گئے۔ نوجوانوں کے ندی میں لاپتہ ہونے پر غوطہ خوروں کو ان کی تلاش کے لیے تعینات کیا گیا۔ غوطہ خوروں نے تینوں کی لاشیں برآمد کر لی ہیں۔ ان کی شناخت کرن وشنو، انل شریمالی اور راجندر وشنو کے طور پر ہوئی ہے۔

بھرت پور میں مکان منہدم، ماں بیٹی کی موت

بھرت پور سے متصل ڈیگ ضلع میں موسلادھار بارش کی وجہ سے کاماں علاقے کے گاونڈی گاؤں میں ایک مکان منہدم ہوگیا، جس کی وجہ سے اس میں موجود ماں بیٹی کی موت ہو گئی۔ مکان گرنے کی آواز سن کر آس پاس کے لوگ بارش کے درمیان اپنے گھروں سے بھاگے اور وہاں پہنچ گئے۔ گاؤں والوں نے بارش کے موسم میں ہی ریسکیو آپریشن شروع کیا۔ گاونڈی کے رہنے والے ساجد کی بیوی اور بیٹی کی مکان کے ملبے تلے دب کر موت ہوگئی۔ اطلاع ملتے ہی تھانہ جرہرہ اور ڈی ایس پی کاماں موقع پر پہنچ گئے۔

سوائی مادھوپور، الور اور بیور میں تین لوگوں کی موت

سوائی مادھوپور ضلع کے پیپلدا-دیولدا گاؤں کے درمیان اینی کٹ میں ڈوبنے سے ایک نوجوان کی موت ہو گئی۔ متوفی نوجوان وشنو بیروا منڈاوری کا رہنے والا تھا۔ وہ اپنے 5-6 دوستوں کے ساتھ مچھلی پکڑنے کے لیے اینی کٹ گیا تھا۔ الور کے راج گڑھ علاقے میں اینی کٹ میں 15 سالہ لڑکے دیپانشو مینا کی ڈوبنے سے موت ہو گئی۔ بیور ضلع کے بھاؤ تالاب میں 15 سالہ ببلو کاٹھ کی بھی ڈوبنے سے موت ہو گئی۔ وہ اپنے دوست کے ساتھ وہاں نہانے گیا تھا۔