نئی دہلی:4فروری (ایجنسی)ہندوستان نے گذشتہ پانچ برسوں کے دوران مختلف ممالک سے تقریباً 24/ ارب ڈالرز کا فوجی سازوسامان درآمد کیا ہے۔جمعے کو وزیر برائے مملکت دفاع اجے بھٹ نے پارلیمنٹ کو بتایا کہ گذشتہ پانچ برسوں کے دوران انڈیا نے امریکہ، روس، فرانس، اسرائیل اور سپین سمیت دیگر ممالک سے تقریباً 24/ ارب ڈالر کا فوجی ساز و سامان آمد کیا ہے۔ درآمد کیے گئے سامان میں ہیلی کاپٹرز، ایئرکرافٹ ریڈارز، راکٹس، بندوقیں، میزائل اور رائفلز شامل ہیں۔وزیر برائے دفاع اجے بھٹ نے پارلیمنٹ کو بتایا کہ ’2017 سے لے کر اب تک انڈیا نے غیرملکی کمپنیوں کے ساتھ فوجی سازوسامان کی درآمد کیلئے 88 معاہدے کیے جبکہ گذشتہ پانچ برسوں کے دوران فوجی سازوسامان حاصل کرنے کیلئے مجموعی معاہدوں کی تعداد 264 تھی۔‘ اجے بھٹ کا کہنا تھا کہ ہندوستانی حکومت درآمدی سامان پر انحصار کو کم کرنے کیلئے ’میڈ ان انڈیا‘ کی پالیسی پر عمل پیرا ہے اور اس پالیسی میں مزید اصلاحات کی جا رہی ہیں۔ہندوستان کی ’ڈیفنس ریسرچ اینڈ ڈولپمنٹ آرگنائزیشن‘ اس وقت 55 منصوبوں پر کام کر رہی ہے جس کے تحت آبدوزوں میں استعمال ہونے والی ٹیکنالوجی، لڑاکا جہاز، کروز میزائلوں، ڈرونز اور ٹینک کش ہتھیار بنائے جا رہے ہیں۔