نئی دہلی:6فروری(ایجنسی)ترکی میں شدید زلزلہ کی وجہ سے ہر طرف تباہی کا عالم دیکھنے کو مل رہا ہے۔ سینکڑوں کی تعداد میں لوگ ہلاک ہوئے اور سینکڑوں زخمیوں کی حالت سنگین بنی ہوئی ہے۔ اس درمیان ترکیہ کو زلزلہ سے نمٹنے کیلئے ہندوستان نے بھی اپنی مدد کا ہاتھ بڑھایا ہے۔ ہندوستان کی طرف سے این ڈی آر ایف کی دو ٹیمیں روانہ کی جا رہی ہیں۔ ساتھ ہی دواؤں اور راحتی اشیا کا ذخیرہ بھی بھیجا جا رہا ہے۔ راحتی اشیا بھیجنے سے متعلق پیر کو پی ایم او(وزیر اعظم دفتر)میں اہم میٹنگ ہوئی۔وزیر اعظم نریندر مودی کی طرف سے اس آفت میں ترکیہ کی ہر ممکن مدد کا اعلان کیا گیا ہے۔ اس کے بعد وزیر اعظم کے پرنسپل سکریٹری ڈاکٹر پی کے مشرا نے فوری راحتی ترکیبوں پر تبادلہ خیال کرنے کیلئے ساؤتھ بلاک میں ایک میٹنگ کی۔ میٹنگ میں یہ طے کیا گیا کہ این ڈی آر ایف کے بچاؤدستہ کے ساتھ ہی طبی ٹیم راحتی سامان کے ساتھ فوراً ترکیہ بھیجی جائے۔ہندوستان کی طرف سے بھیجی جا رہی ٹیم میں خصوصی تربیت یافتہ ڈاگ اسکواڈ اور ضروری سامان کے ساتھ 100 / اہلکاروں والی این ڈی آر ایف کی دو ٹیمیں تلاشی اور بچاؤ کام کیلئے زلزلہ متاثرہ علاقے میں جانے تیار ہیں۔ ضروری ادویات، تربیت یافتہ ڈاکٹرس اور پیرامیڈکس کے ساتھ میڈیکل ٹیمیں بھی تیار کی جا رہی ہیں۔