نئی دہلی:4مارچ(ایجنسی)آبکاری پالیسی معاملے میں سی بی آئی ریمانڈ پر موجود دہلی کے سابق نائب وزیر اعلیٰ منیش سیسودیا کو راحت نہیں ملی ہے۔ راوز ایوینیو کورٹ نے سیسودیا کی سی بی آئی ریمانڈ 6 مارچ تک بڑھانے کا فیصلہ سنایا ہے۔ اس کے علاوہ سیسودیا کی ضمانت عرضی پر سماعت 10 مارچ کو ہوگی۔سی بی آئی نے عدالت میں کہا کہ منیش سیسودیا جانچ میں تعاون نہیں کر رہے ہیں، اس لیے تین دن کی مزید ریمانڈ دی جائے۔ سی بی آئی نے عدالت کو بتایا کہ سیسودیا سے پوچھ تاچھ کی ریکارڈنگ سی ڈی میں ہے۔ پوچھ تاچھ کیلئیے ابھی ملزموں کا آمنا سامنا نہیں ہوا ہے۔ اس درمیان سیسودیا نے عدالت میں کہا کہ وہ مجھے 10-9 گھنٹے تک پوچھ تاچھ کیلئے بٹھا رہے ہیں اور بار بار وہی سوال پوچھ رہے ہیں۔ یہ ذہنی اذیت سے کم نہیں ہے۔عآپ رکن اسمبلی سوربھ بھاردواج نے اس معاملے میں کہا کہ سی بی آئی کو ثبوت اور سچائی سے کوئی لینا دینا نہیں ہے۔ وہ صرف وہی سن رہے ہیں جو مرکزی حکومت کہہ رہی ہے۔ یہ پورا عمل منیش سیسودیا کو پریشان کرنے کیلئے ہے۔واضح رہے کہ منیش سیسودیا کو دہلی حکومت کی آبکاری پالیسی میں مبینہ گھوٹالے کے معاملے میں سی بی آئی نے اتوار کے روز گرفتار کیا تھا۔ سی بی آئی نے انھیں پیر کے روز راوز ایوینیو کورٹ میں پیش کیا تھا۔ عدالت نے سیسودیا کو 5 دن کی سی بی آئی حراست میں بھیج دیا تھا۔