نئی دہلی:4مارچ (ایجنسی) اقوام متحدہ انسانی حقوق کونسل (یو این ایچ آر سی) میں پاکستان کی وزیر خارجہ حنا ربانی کھر کے الزامات پر ہندوستان نے کرارا جواب دیا ہے۔ رپورٹ کے مطابق ہندوستانی سفارت کار سیما پوجانی نے پاکستان کو دہشت گردی کے مسئلہ پر آڑے ہاتھ لیا اور اسے آئینہ دکھانے کا کام کیا۔سیما پوجانی نے کہا کہ آج پاکستان میں کوئی مذہبی اقلیت آزادی سے نہیں رہ سکتی اور نہ ہی اپنے مذہب پر عمل کر سکتی ہے۔ پاکستان کی پالیسیاں دنیا بھر میں ہزاروں شہریوں کی ہلاکت کی براہ راست ذمہ دار ہیں۔
پاکستان کے اپنے کمیشن آف انکوائری کو گزشتہ ایک دہائی میں جبری گمشدگیوں کی 8463 شکایات موصول ہوئی ہیں۔ بلوچ عوام اس ظالمانہ پالیسی کا خمیازہ بھگت رہے ہیں۔ طلباء، ڈاکٹر، انجینئر، اساتذہ اور کمیونٹی لیڈر معمول کے مطابق غائب ہو جاتے ہیں۔ہندوستان نے کشمیر پر بھی پاکستان کو منہ توڑ جواب دیا۔ پوجانی نے کہا کہ جموں و کشمیر اور لداخ یونین ٹیریٹری کے پورے علاقے ہندوستان کا حصہ تھے، ہیں اور ہمیشہ رہیں گے۔ پڑوسی ملک ہمیشہ ہندوستان کیخلاف پروپیگنڈہ پھیلانے میں ملوث رہا ہے۔ یہ پاکستان کی غلط ترجیحات کی نشانی ہے۔ انہوں نے کہا کہ پاکستان غیر قانونی طور پر ہندوستانی سرزمین پر قبضہ کر رہا ہے۔