لکھنؤ:26مئی (آئی ا ین ایس) اردو زبان کے مشہور شاعر منور رانا کی طبیعت بگڑنے کے بعد انہیں لکھنؤ کے اسپتال میں داخل کیا گیا ہے- جہاں انہیں وینٹی لیٹر کی سپورٹ پر رکھا گیا ہے اور ان کی حالت نازک بنی ہوئی ہے- منور رانا کی بیٹی سمیہ رانا نے گزشتہ روز ایک ویڈیو جاری کرکے اپنے والد کیلئے لوگوں سے دعاؤں کی درخواست کی تھی-منور رانا کی صاحبزادی سمیہ رانا نے بتایا کہ ان کے 70سالہ والد کو پتے کی تھیلی کی سرجری کے بعد طبیعت بگڑنے پر اپولو اسپتال میں داخل کرایا گیا ہے-
وہ گلے کے کینسر میں بھی مبتلا تھے اور ان کا ڈائیلاسس کیا جا رہا تھا- سمیہ رانا کے مطابق منور رانا کی پتے کی تھیلی کی سرجری گزشہ منگل کو اسپتال میں کی گئی تھی-جب انہیں ڈائیلاسس کیلئے لے جایا گیا تو معلوم چلا کہ پتھری کی وجہ سے ان کی پتے کی تھیلی پوری طرح خراب ہو گئی ہے- ان کا آپریشن کیا گیا، لیکن تبھی سے ان کی طبیعت بگڑ رہی ہے-خیال رہے کہ منور رانا ان شعراء میں ہیں جنہوں نے اردو غزل میں کثرت سے ماں کا ذکر کیا ہے- ان کے یہاں غزلوں میں دیگر موضوعات کے علاوہ کثیر تعداد میں ایسے اشعار ہیں جن میں ’ماں‘ جیسی متبرک ہستی کو موضوع بنا کر اُن کیفیات و جذبات کا اظہار کیاہے، جو ایک ماں کے دل میں اپنے بچوں کے تئیں موجزن ہوتے ہیں -