دہلی کے دورے کی سیاسی تشریح نہ کی جائے : شیوکمار
بنگلورو، 4 دسمبر (یو این آئی) کرناٹک کے نائب وزیر اعلی ڈی کے شیوکمار نے ریاست میں قیادت کی تبدیلی کے بارے میں تمام قیاس آرائیوں کو مسترد کرتے ہوئے کہا کہ ان کے دہلی کے حالیہ دورے کی سیاسی تشریح نہیں کی جانی چاہئے اور یہ خالصتاً ذاتی دورہ تھا۔ مسٹر شیوکمار نے کہا کہ میڈیا کی یہ خبریں کہ وہ کانگریس ہائی کمان کے ساتھ طویل عرصے سے اقتدار کی تقسیم کے فارمولے کو آگے بڑھانے کے لیے ملے ہیں، بے بنیاد ہیں۔ انہوں نے کہا کہ وہ اور وزیراعلی سدارامیا مل کر کام کر رہے ہیں اور انہوں نے بدھ کی شام بیلگاوی میں سرمائی اجلاس کی تیاریوں کو حتمی شکل دینے کے لئے وزراءکے ساتھ میٹنگ کی تھی۔ نائب وزیر اعلیٰ نے کہا کہ انہوں نے پارٹی کی 14 دسمبر کی ریلی کے انتظامات کا بھی جائزہ لیا اور اسے تنظیمی ذمہ داری قرار دیا۔ انہوں نے اس میں کسی سیاسی اثر کو منسوب نہیں کیا۔ قابل ذکر بات یہ ہے کہ مسٹر شیوکمار کے تبصرے ان کے اور وزیراعلی سدارامیا کے درمیان بنگلورو میں ہونے والی ملاقاتوں کے سلسلہ کے بعد سیاسی قیاس آرائیوں کے درمیان آئے ہیں، جس میں دو ناشتے کی میٹنگیں بھی شامل ہیں جن کا مقصد حکمراں پارٹی کے اندر اتحاد کا مظاہرہ کرنا ہے ۔ مسٹر سدارامیا نے بارہا کہا ہے کہ کوئی اختلاف نہیں ہے ۔ انہوں نے مسٹر شیوکمار کو “بھائی” کہا ہے اور قیادت کی تبدیلی سے متعلق کوئی بھی فیصلہ کانگریس ہائی کمان پر چھوڑنے کی بات کی ہے ۔