ایئرپورٹ پر، کل کسی اور شعبے میں۔”
دھرمستھلا کیس کا سارا سچ اسمبلی میں پیش کیا جائے گا: وزیر داخلہ
بنگلورو۔6 دسمبر (سالار نیوز)وزیر داخلہ ڈاکٹر جی پرمیشور نے کہا ہے کہ دھرمستھلا معاملہ میں اپوزیشن بی جے پی کی طرف سے اگر اسمبلی میں سوال اٹھایا جا تا ہے تو اس کا جواب دیا جائے گا۔ اس معاملہ میں حکومت کے پاس چھپانے کیلئے کچھ نہیں ہے، سارے حقائق کو منظر عام پر لایا جائے گا۔ اخباری نمائندوں سے بات کرتے ہوئے ڈاکٹر جی پرمیشور نے کہا کہ ریاست میں نظم وضبط کی صورتحال کے بارے میں بھی اسمبلی اور کونسل میں اپوزیشن او ر تمام ممبروں کے خدشات کو دور کیا جائے گا۔انہوں نے کہا کہ اعداد وشمار کے ساتھ بتایا جائے گا کہ کرناٹک میں نظم وضبط کی صورتحال اطمینان بخش ہے۔ انہوں نے کہا کہ وہ یہ دعویٰ تو نہیں کرتے کہ ریاست میں کوئی ناخوشگوار واردات ہوئی ہی نہیں ہے۔ لیکن جن دیگر ریاستوں میں بی جے پی کی حکومتیں ہیں وہاں نظم وضبط کی صورتحال کے متعلق منظر نامہ اعداد وشمار کے ساتھ پیش کر کے ریاست کی صورتحال کاموازنہ کیا جائے گا ۔ انہوں نے کہا کہ کرناٹک میں ساڑھے چار سال کی بی جے پی حکومت کے دورمیں نظم وضبط کی صورتحال کیاتھی اور اب دوسال سے کیا ہے وہ تفصیلات بھی پیش کی جائیں گی۔ انہوں نے کہا کہ بنگلورو کی پراپنا اگراہارا جیل میں قیدیوں کو سہولتوں کی فراہمی کے معاملے میں کون افسر شامل تھے ان کے نام بھی ایوا ن میں بتائیں گے۔ساتھ ہی یہ بھی بتایا جائے گا کہ ان افسروں کے نام سامنے آتے ہی حکومت نے ان کے خلاف بلا مروت کارروائی کی ہے۔ چکمگلورو میں مقامی کانگریس لیڈر کے قتل کے بارے میں ایک سوال پر ڈاکٹر پرمیشور نے کہا کہ پولیس اس معاملہ کی جانچ کر رہی ہے۔ انہوں نے کہا کہ جانچ کے دوران پولیس نے قتل کی اصل وجہ معلوم کر لی ہے۔ اس سلسلہ میں مقامی پولیس سے کہا گیا ہے کہ وہ خاطیوں کے خلاف سخت کارروائی کرے ۔ وزراء کی ملاقاتوں سے متعلق ایک سوال پر وزیر داخلہ نے کہا کہ وزراء اگرآپس میں ملاقات کر کے سیاسی حالات پر بات چیت کریں تو اس میں ہرج کیا ہے۔ انہوں نے کہا کہ ستیش جارکی ہولی کرناٹک کے وزیر برائے تعمیرات عامہ ہیں ان کے پاس ایک انتہائی اہم قلمدان ہے وہ اگر وزراء اور سیاسی قائدین سے بات کریں تو اس کا سیاسی مطلب نکالنے کی ضرورت نہیں۔ وزراء میں اگر سیاست پر بھی بات چیت ہو تی ہے تو اس میں غلط کیا ہے۔ وزراء بھی سیاستدان ہی ہیں اس لئے ان کے سیاست پر بات کرنے کے معاملہ کو بڑھا چڑھا کر پیش کرنے کی ضرورت نہیں۔ منگل کے روز بیلگاوی میں ہونے والے سی ایل پی اجلاس کے بارے میں ایک سوال پر ڈاکٹر پرمیشور نے کہا کہ اسمبلی اور کونسل میں اپوزیشن کے سوالات کا موثر طور پر جواب دینے کی حکمت عملی پر اس اجلاس میں بحث کی جائے گی۔