یتنال نے سدارامیا سے عوامی مقامات میں نماز پڑھنے پر پابندی لگانے کا مطالبہ کیا
بنگلور۔ 17 اکتوبر (یو این آئی) سابق مرکزی وزیر اور بی جے پی کے معطل لیڈر بسون گوڑا پاٹل یتنال نے کرناٹک حکومت سے مطالبہ کیا ہے کہ وہ مذہبی سرگرمیوں کے لیے عوامی مقامات کے استعمال پر بھی یکساں پابندی نافذ کرتے ہوئے عوامی مقامات پر سرکاری اجازت کے بغیر نماز پڑھنے پر پابندی عائد کرے ۔ وزیر اعلی سدارامیا کو لکھے گئے خط میں یتنال نے کہا، “میں آپ کے دفتر سے درخواست کرتا ہوں کہ وہ ریاست بھر کے تمام ڈپٹی کمشنروں اور پولیس کمشنروں کو مناسب ہدایات جاری کریں تاکہ یہ یقینی بنایا جا سکے کہ سڑکوں، فٹ پاتھ یا سرکاری احاطے میں رسمی اجازت کے بغیر نماز نہ پڑھی جائے ۔ یتنال نے دلیل دی کہ کرناٹک حکومت نے حال ہی میں نجی تنظیموں اور این جی او زپر سرکاری املاک، تعلیمی اداروں اور عوامی مقامات کو ذاتی یا ادارہ جاتی یا مذہبی مقاصد کے لیے استعمال کرنے پر پابندی لگا دی ہے ۔ اس کے باوجود کچھ مذہبی سرگرمیاں بغیر اجازت کے منعقد کی جا رہی ہیں۔ سڑکوں اور سرکاری احاطے میں ادا کی جانے والی نماز کی مثال دیتے ہوئے انہوں نے کہا کہ اس سے گاڑیوں اور پیدل چلنے والوں کی نقل و حرکت میں رکاوٹ پیدا ہوتی ہے ۔ اس سے عوام کو پریشانی ہوتی ہے اور لوگوں کو خطرہ لاحق ہوتا ہے ۔ اس سے آئین کے آرٹیکل 19 اور 21 کی خلاف ورزی ہوتی ہے ، جن میں نقل و حرکت کی آزادی اور زندگی اور ذاتی تحفظ کے حق کی ضمانت دی گئی ہے ۔