سدارامیا اپنی پانچ سالہ میعاد مکمل کریں گے : یتیندرا
میسور، 11 جولائی (یو این آئی) کرناٹک کی اعلیٰ قیادت میں تبدیلی کی مسلسل قیاس آرائیوں کے درمیان کانگریس کے ایم ایل سی یتیندرا سدرامیا نے ایک بار پھر کہا کہ ان کے والد، وزیر اعلیٰ سدارامیا اپنی پانچ سالہ مدت پوری کریں گے ۔میسور میں میڈیا سے بات کرتے ہوئے ، یتندرا سدارامیا نے درمیانی مدت کی قیادت کی تبدیلی کی باتوں کو مسترد کرتے ہوئے کہا، “یہ معاملہ کانگریس ہائی کمان کے سامنے بھی نہیں ہے ۔ بھارتیہ جنتا پارٹی پہلے دن سے کہہ رہی ہے کہ ہماری حکومت گرجائے گی یا وزیر اعلیٰ تبدیل ہو جائیں گے – لیکن اب تک ایسا کچھ نہیں ہوا ہے ۔”انہوں نے اعتراف کیا کہ نومبر میں حکومت کے ڈھائی سال مکمل ہونے کے ساتھ ہی پارٹی میں اس سلسلے میں بات چیت شروع ہوسکتی ہے ، لیکن حتمی فیصلہ پارٹی ہائی کمان اور ایم ایل ایز کو کرنا ہوگا۔انہوں نے کہا، “کچھ لیڈر خواہش مند ہو سکتے ہیں اور یہ فطری ہے ۔ لیکن آخری فیصلہ قیادت پر منحصر ہوتاہے ۔ ان دنوں دارالحکومت دہلی میں وزیر اعلیٰ سدارامیا نے بھی یہی بات دہرائی ہے اور کہا ہے کہ وزیر اعلیٰ کے عہدے کے لیے کوئی جگہ خالی نہیں ہے ۔”دریں اثنا سدارامیا کے قریبی سمجھے جانے والے تعمیرات عامہ کے وزیر ستیش جارکی ہولی نے وزیر اعلیٰ کے موقف کی حمایت کی اور کہا کہ صرف 10 فیصد ایم ایل اے قیادت کی تبدیلی پر بات کر رہے ہوں گے ۔ انہوں نے کہا کہ یہ کوئی نئی بات نہیں ہے ، وزیر اعلیٰ نے صرف اپنے پہلے کے موقف کو دہرایا ہے ۔ میڈیا کو اب ان قیاس آرائیوں کو ختم کرنا چاہیے ۔