شہر کے وقار کو داغدار کرنے والوں کو خود احتسابی کرنی چاہیے:شےوکمار
بنگلورکی ترقی کے لےے 1.04لاکھ کروڑکامنصوبہ ،پانچ کارپورےشنوں کو50کروڑتک خرچ کی اجازت
بنگلور۔ 19 اکتوبر (سالارنےوز)ریاست کے نائب وزیر اعلیٰ ڈی کے شیوکمار نے بنگلورو کے وقار کا دفاع کرتے ہوئے کہا کہ جو لوگ بنگلورو کی سہولتوں سے فائدہ اٹھا کر ترقی کی منازل طے کر چکے ہیں، وہی آج شہر پر تنقید کر رہے ہیں۔ انہوں نے بالواسطہ طور پر صنعتکار کرن مجمدار شا کو نشانہ بناتے ہوئے کہا کہ بنگلورو کی ترقی میں حصہ لینے والوں کو اپنی جڑوں کو نہیں بھولنا چاہیے۔بروز اتوار کورمنگلا کے ویر یودھا پارک میں منعقدہ ”بنگلورو نڈےگے“ مہم کے تحت شہریوں سے مکالمہ اور شکایات سننے کے بعد میڈیا سے گفتگو کر تے ہوئے انہوں نے کہاکہ
تنقید جمہوریت کے لئے ضروری ہے، لیکن حد سے بڑھنا تباہی ہے۔ حکومت عوامی شکایات کے حل کے لئے پرعزم ہے۔ ہم نے ایسا نظام بنایا ہے جہاں شہری موبائل ایپ کے ذریعے گڑھوں کی تصاویر اپ لوڈ کر کے حکومت کو آگاہ کر سکتے ہیں۔ میڈیا آزاد ہے اور اپنی رپورٹنگ کر رہا ہے، مگر کچھ لوگ تباہ کن حد تک تنقید کرتے ہیں۔انہوں نے مزید کہاہم اپنا کام کر رہے ہیں، لیکن اپوزیشن اور کچھ عناصر بلاوجہ منفی تاثر پھیلا رہے ہیں۔ ہم دہلی اور ممبئی جیسے شہروں میں بھی سڑکوں کی حالت دکھا سکتے ہیں۔شیوکمار نے بتایا کہ بنگلورو کی پانچ کارپوریشنوں کو بغیر ٹینڈر کے 50 کروڑ روپے تک کے کاموں کی براہ راست منظوری کی اجازت دی گئی ہے۔ہر کارپوریشن کونسل 10 کروڑ روپے تک کے کاموں کی منظوری دے سکتی ہے۔کمشنر کو 3 کروڑ روپے خرچ کرنے کا اختیار دیا گیا ہے۔اسٹینڈنگ کمیٹی کی حد 5 سے بڑھا کر 10 کروڑ روپے کر دی گئی ہے۔
1.04 لاکھ کروڑ روپے کا ترقیاتی منصوبہ:نائب وزےراعلیٰ نے اعلان کیا کہ حکومت نے بنگلورو کی جامع ترقی کے لئے 1.04 لاکھ کروڑ روپے کا منصوبہ تیار کیا ہے، جس میں ٹنل سڑکیں، ایلیویٹڈ کاریڈار، ڈبل ڈیکر راستے، بفر روڈ، شہر کی خوبصورتی کے منصوبے اور ایل ای ڈی اسٹریٹ لائٹس شامل ہیں۔انہوں نے کہاشہر کی آبادی 1.40 کروڑ تک پہنچ چکی ہے، روزانہ 3 ہزار نئی گاڑیاں رجسٹر ہو رہی ہیں اور تقریباً 70 لاکھ افراد روزگار، تعلیم اور کاروبار کے لئے یہاں آتے ہیں۔تقریب میں 180 سے زائد شہریوں نے شکایات پیش کیں، جن میں شانتی نگر ہاو¿سنگ سوسائٹی، سینیٹری لائن، بارش سے متاثرہ علاقے، کورمنگلا میٹرو لائن، ایئرپورٹ بس سسٹم، بیلندور جھیل، فٹ پاتھ اور شجرکاری کے مسائل شامل تھے۔شیوکمار نے کہامیں اور وزیر رام لنگا ریڈی اکیلے بنگلورو کو تبدیل نہیں کر سکتے۔ عوامی تعاون ضروری ہے۔ کوڑا کرکٹ کے نظم سے لے کر شہری منصوبہ بندی تک، سب کو حکومت کے ساتھ ہاتھ ملانا چاہیے۔انہوں نے شہریوں کو تاکید کی کہ وہ اپنی جائیدادوں کا ریکارڈ درست کرائیں۔حکومت نے B کھاتے سے A کھاتے میں تبدیلی کی اجازت دی ہے۔ یہ آپ کی جائیداد کی قدر دوگنی کر دے گا، اور یہ عمل مکمل طور پر شفاف ہوگا۔شیوکمار نے کہا کہ ریاستی حکومت عوامی بہبود کے لئے ہر سال 1 لاکھ کروڑ روپے خرچ کر رہی ہے۔پانچ گےارنٹی اسکیموں کے لئے 52 ہزار کروڑ روپے۔کسانوں کو مفت بجلی کے لئے 20 ہزار کروڑ روپے۔انہوں نے کہاکہ ہم عوام کو مہنگائی سے بچانے اور سماجی مساوات کے لئے کام کر رہے ہیں۔انہوں نے شہریوں سے اپیل کی کہ وہ حکومت کے جاری سماجی، اقتصادی اور تعلیمی سروے میں بھرپور حصہ لیں۔یہ سروے مستقبل کے لئے اہم ہے۔ عوام کو ضروری معلومات فراہم کرنی چاہئیں۔ایک سوال کے جواب میں شیوکمار نے کہاہم نے آر ایس ایس پر کوئی نیا اصول نہیں بنایا۔ ہم صرف 2013 میں جگدیش شٹر حکومت کے حکم کو دوبارہ نافذ کر رہے ہیں۔ انہوں نے کہا کہ اس مہم کا مقصد عوام سے براہ راست رابطہ قائم کر کے اچھی حکمرانی فراہم کرنا ہے، اور حکومت شہریوں کے تمام مسائل کو حل کرنے کے لئے پرعزم ہے۔