مختلف سڑکوں پر کھدائی کے سبب عام لوگوں کو ہونے والی پریشانی کے بارے میں دن بدن بڑھتی ہوئی شکایتوں پر پلکیشی نگراسمبلی حلقہ کے رکن اسمبلی اے سی سرینواس نے وضاحت کرتے ہوئے کہا ہے کہ ریاستی حکومت کی طرف سے شہر کی مختلف سڑکوں کو جامع انداز میں ترقی دینے کےلئے منتخب کیا گیا ہے ان میں ان کے حلقہ کی چند اہم سڑکیں بھی شامل ہیں ان میں فریزر ٹاو¿ن علاقہ کی ماسک روڈ اور ایم ایم روڈ پر کام شروع کیا گیا ہے۔ انہوں نے بتایا کہ جامع ترقیاتی منصوبے کے تحت ان دونوں سڑکوں کو تقریباً300کروڑ روپیوں کی لاگت سے وہائٹ ٹاپنگ کروائی جا رہی ہے۔ چونکہ وہائٹ ٹاپنگ کے بعد ان سڑکوں پر کسی بھی طرح کی کھدائی کی اجازت نہیں ہو گی اس لئے اس کام کو پورا کرنے سے پہلے ہی یقینی بنایا جا رہا ہے کہ تمام پائپ لائینوں اور بجلی کے نظام کو زیر زمین کر دیا جائے۔ اس میں پانی، ڈراینیج، بجلی اور آپٹک فائبر تمام لائنوں کو زیر زمین کرنے کےلئے کھدائی کا کام کافی تیزی سے کیا جا رہا ہے۔ ماہ رمضان کے دوران ان سڑکوں پر کھدائی کے سبب مقامی لوگوں کو پریشانی کے خدشات کے بارے میں انہوں نے کہا کہ ےہ کام تقریباً 3ماہ سے جاری ہے اور اس کو پورا ہونے میں مزید چھ ماہ کا عرصہ لگ سکتا ہے۔ لیکن اس کام کے مکمل ہوجانے کے بعد لوگ محسوس کریں گے کہ ان دونوں سڑکوں کو معیاری انداز میں ترقی سے ہمکنار کیا گیا ہے۔ اس کےلئے امسال رمضان کے دوران تھوڑی بہت دشواری ہو سکتی ہے جس کےلئے وہ حلقہ کے عوام سے معذرت خواہ رہیں گے لیکن اس کے ساتھ ہی ان سڑکوں سمیت دیگر علاقو ںمیں جاری ترقیاتی کامو ںکو پورا کرنے میں وہ چاہتے ہیں کہ مقامی لوگ تعاون کریں تاکہ جلد از جلد ان کو پورا کیا جا سکے۔ انہوں نے کہا کہ ماہ رمضان کے دوران اس بات کی کوشش کی جائے گی کہ مساجد کے آس پاس کھدائی کے سبب مصلیان او ر رزوہ داروں کو کسی طرح کی پریشانی نہ ہو لیکن اس کے ساتھ ہی ترقیاتی کاموں کو پورا کرنے کےلئے کام کو تیزی سے آگے بڑھایا جائے گا۔انہوں نے کہا کہ چھ سات ماہ میں جب ےہ کام پورا ہو جائے گا تو ان دونوں سڑکوں کو بین الاقوامی معیار کا بنا دیا جائے گا اور اب جو لوگ اس کام کی وجہ سے دشواری کی شکایت کر رہے ہیں وہ بھی اس پر ضرور شاباشی دیں گے۔