بنگلورو جلد ہی ”کوانٹم کیپٹل“ہوگا: ڈی سی ایم ڈی کے شیوکمار
بنگلورو، 31 جولائی(سالار نیوز): نائب وزیر اعلیٰ ڈی کے شیوکمار نے آج کہا کہ بنگلورو جلد ہی”کوانٹم کیپٹل“ بن جائے گا کیونکہ حکومت کوانٹم ٹیکنالوجی کےلئے ایک وقف کلسٹر قائم کر رہی ہے۔کوانٹم انڈیا بنگلورو 2025کے پہلے ایڈیشن کی افتتاحی تقریب سے خطاب کرتے ہوئے، انہوں نے کہا کہ مجھے یہاں اس تقریب میں آکر خوشی ہوئی ہے جو ٹیکنالوجی کے محاذ کی نشاندہی کر رہا ہے۔ کرناٹک کے پاس بہت زیادہ انسانی وسائل ہیں۔ ہماری ریاست ملک کی دیگر ریاستوں سے مقابلہ نہیں کر رہی ہے لیکن ہم عالمی سطح پر مقابلہ کر رہے ہیں۔ انہوں نے کہا کہ ہم نے ٹکنالوجی میں عالمی رہنما بننے بنگلورو کےلئے ایک مضبوط بنیاد رکھی ہے۔ ہماری حکومت کوانٹم ٹکنالوجی میں بھی قیاد ت کرنے کےلئے اسے ہر طرح کی مدد فراہم کرنے کےلئے پرعزم ہے۔ جب میں ایس ایم کرشنا حکومت میں وزیر تھا، ہم آئی ٹی پالیسی لائے اور اس کی وجہ سے بنگلورو کی ترقی ہوئی جس کا آج ہم مشاہدہ کر رہے ہیں۔شیوش کمار نے کہا کہ کرناٹک کے ٹائر ٹو اور ٹائر تھری شہر بھی بہترین ٹیلنٹ اور انفراسٹرکچر پیش کرتے ہیں۔ ٹیک انڈسٹری کو اپنے دفاتر قائم کرنے کےلئے ان شہروں کو بھی دیکھنا چاہئے۔ ہماری ریاست میں 300 سے زیادہ کالج ہیں۔ ہمارا ٹیکنیکل ایجوکیشن کا ورثہ ایک صدی پرانا ہے جب یہاں آئی آئی ایس سی قائم کیا گیا تھا۔ جواہر لعل نہرو کے پبلک سیکٹر انڈسٹریلائزیشن نے بھی بنگلور کو بڑے پیمانہ پر ترقی کرنے میں مدد کی۔ انہوں نے مزید کہاکہ کوانٹم ٹکنالوجی ایک فرنٹیئر ٹیکنالوجی ہے، آئیے ہم اس کی طرف دلیرانہ انداز میں آگے بڑھیں۔ امید ہے کہ کوانٹم ٹکنالوجی بھی معاشرے کی بہتری میں اپنا حصہ ڈالے گی۔ ہماری حکومت کوانٹم ٹیکنالوجی کے انقلاب کے لیے ہر ممکن تعاون فراہم کرے گی۔ آئیے بنگلورو اور کرناٹک میں ایک اور انقلاب برپا کریں۔
