ٹماٹر کی قیمتوں میں ایک بار پھر بھاری اضافہ کا خدشہ
مہاراشٹرا میں موسلا دھار بارشوں سے فصل پر اثر پڑنے کاخوف
کولار28 جولائی(سالار نیوز) کرناٹک میں ٹماٹر کی قیمتوں میں اضافہ کا اندیشہ ظاہر کیا جا رہاہے، اگر آنے والے دنوں میں مہاراشٹر اور دیگر شمالی ریاستوں میں موسلا دھار بارش جاری رہی تو خوردہ قیمتیں ممکنہ طور پر 85 روپے فی کلو تک پہنچ جائیں گی، جس سے ان گھرانوں پر ایک نیا بوجھ پڑے گا جو بنیادی اجزا پر انحصار کرتے ہیں۔ کولار اے پی ایم سی مارکیٹ جو کہ ایشیا کی دوسری سب سے بڑی مارکیٹ ہے میں ٹماٹر کا 15 کلو کا کریٹ، 750روپے میں فروخت ہوا، جو کہ صرف تین دن پہلے 250-350 روپے تھا۔تاجروں نے خبردار کیا ہے کہ اگر اگلے ہفتہ تک موسمی حالات میں بہتری نہیں آئی تو کرناٹک میں ٹماٹر کی خوردہ قیمت 85 روپے فی کلو تک پہنچ جائے گی۔اے پی ایم سی مارکیٹ کے سکریٹری کرن نے کہا کہ ٹماٹر پیدا کرنے والی بڑی ریاست مہاراشٹرا میں مسلسل بارش نے اتر پردیش، مغربی بنگال، ہریانہ اور تمل ناڈو جیسی ریاستوں کو سپلائی میں خلل ڈالا ہے۔اے پی ایم سی مارکیٹ میں ٹماٹر کے کاشتکار اور بیوپاری سی ایم آر سری ناتھ نے بھی کہا کہ بھاری بارش نے مہاراشٹرا کے بڑے علاقوں میں ٹماٹر کی فصل کو متاثر کیا ہے۔اگر پڑوسی ریاست میں مزید ایک ہفتہ تک بارش جاری رہتی ہے، تو کولار اے پی ایم سی مارکیٹ میں قیمتیں 1,000 سے 1,200 روپے فی کریٹ تک پہنچ جائیں گی۔اس رکاوٹ نے کرناٹک سے ٹماٹروں کی مانگ میں نمایاں اضافہ کیا ہے، خاص طور پر کولار کے علاقے سے۔200 سے زیادہ گاڑیاں 2,500 ٹن سے زیادہ پھل لے کر اتوار کو اے پی ایم سی مارکیٹ سے مختلف مقامات کےلئے روانہ ہوئیں۔زیادہ مانگ کے باوجود، مقامی سپلائی محدود ہے، کیونکہ کولار کے بہت سے کسانوں نے مبینہ طور پر پچھلے چار مہینوں میں کم قیمتوں کی وجہ سے ٹماٹر کی کاشت کرنے سے گریز کیا تھا۔
